بسم الله الرحمن الرحيم
بمناسبة حلول موسم السياحة الصينية ورغبة كتير من الناس دخول مجال الإرشاد السياحى باللغة الصينية
هنقدملكم حصريا سلسلة مقالات من إعداد أ.خالد شريف وهو مرشد صينى كبير معروف و ذو خبرة طويلة فى المجال، نشكره على قبول الدعوة لكتابة سلسلة المقالات اللى غرضها الوحيد هو إفادة وتعليم الأجيال القادمة من المرشدين
سلسلة المقالات دى هتكون تحت عنوان " إزاى تبقى مرشد صينى محترف" وده هيكون أول مقال ، تابعونا على الصفحة و افتحوا المدونة دايما عشان هننزل كل فترة مقال جديد فى نفس السلسلة
و يا رب الكل يستفيد
إزاى تبقى مرشد صينى محترف؟
نصائح عامة
زميلى العزيز الجديد فى مهنه الأرشاد السياحى الصينى
أتمنى لك التوفيق والنجاح ، عشان تكون مرشد مميز فى بعض الحاجات اللى اتعلمتها أحب
أنقلها لك
- 1متبدأش مهنه الأرشاد غير لما تكون واثق
انك هتأدى كويس وهتكون مرشد متمكن متستعجلش أنك تستغل مرشد بسرعه .لو بدأت قوى هتصعد
سريعا ولو بدأت ضعيف هتفضل بقيه حياتك العمليه مرشد درجه تانيه وعلى الهامش ذاكر وأتدرب
كويس أولا. غالبا هتحتاج من شهرين لتلاته لترك أنطباع أولى عنك كمرشد ، ومن ٣ ل٥ سنين
لأثبات كفاءتك وصناعه أسم متميز ليك فى مجال الأرشاد . لو شغلك ممتاز ولغتك قويه هتصعد
بسرعه غصب عن أى شخص وأى ظروف
2-شغلك ثم شغلك ثم شغلك ثم علاقاتك . لو أعتمدت فى
نجاحك على العلاقات فقط هتنجح نجاح مؤقت مرتبط بوجود الاوبيريتور أو التوليدر فى مكانه
. صدقنى شغلك وكفاءتك وتنظيمك الفايل واحترامك للوقت ثم إنتاجك المادى هوه فقط اللى
هيضمن لك إستمرار النجاح وسرعه الصعود. ودايما إحترم من أكبر منك سنا وخبره حتى يحترمك
ويقدرك الجميع صغيرهم وكبيرهم .
3-فى المهنه دى اللغه هيه العمود الفقرى ليك والتاريخ
المصرى وثقافته هيه تميزك والوقت هوه عدوك اللى لازم تبقى مروضه ومتحكم فيه كويس .
4-أهم حاجه فى أى فايل هوه أول ساعه فحاول تروح تستقبل
السائح من المطار حتى لو مش مطلوب . الساعه الاولى والانطباع الاول مهم جدا للسائح
أنه يطمن ان معاه مرشد قوى ومتمكن وبيقدره وجاء بنفسه لأستقباله . وحاول فى الاستقبال
تعمل ترحيب قوى وتشرح البرنامج بأستفاضه ثم نبذه بسيطه وخطوط عريضه عن المواضيع اللى
هشترحها لهم فى الباص زى العادات والتقاليد والأعياد والاقتصاد والتعليم والديانات
وكيف يرى المصريون الصين وغيره وغيره.
-5لازم فى كل شغلك بغض النظر عن أقدميتك أنك
تدى الجيست اللى هوه عاوزه ( شرح وخدمه وإهتمام وإحترام للمواعيد عشان يديك المردود
المادى اللى أنت عاوزه ، وأياك وأحذر من أنك تغير من مستوى شغلك أو معاملتك لو ملقيتش
المردود المادى ده لأنك فى الأساس مرشد مش بياع. أجتهد والمردود من الله .
-6الأكل من الأشياء المهمه للجيست الصينى
، أنت كمرشد لازم تبقى حاجز مع المطعم قبلها بفتره كافيه وتأكد حجزك حسب البرنامج
٧ طبق ولا ٨ طبق وتتأكد من الكميات بنفسك وتراعى الجيست اللى معاك أكله سبايسى زى خونان
وتشونج تشينج وسيتشوان ولا ملح قليل زى تايوان ، وتسأله الاكل كفايه ولا لا والتيست
وتأكد عليه ياخد مج الشاى بتاعه وهو نازل عشان يملاه ميه سخنه .
7-الأماكن الممنوع فيها التصوير او حتى اصطحاب الكاميرا
هى داخل المتحف وداخل الهرم ووادى الملوك( من داخل المقابر أوخارجها) ووادى الملكات
والمعبد اليهودي وداخل معبد ابو سمبل ومقبره كوم الشقافه وكنيسه ابوسرجه وممنوع استخدام
الفلاش داخل الكنيسة المعلقة وداخل معبد سوبك بكوم امبو وممنوع استخدام كاميرات الفيديو
فوق جسم السد العالى.
-8هام جدا جدا (ضروره التواجد فى المطار بساعتين
على الأقل قبل الرحلات الخارجيه وساعه على الأقل قبل الرحلات الداخليه).
9-حاول بقدر الأمكان تخلص بيع الاوبشنال والتحصيل
قبل الوصول للغردقه ، وبالنسبه للشوبينج تجنب عمل الشوبينج أول يوم بسبب أرهاق الجيست
من رحله طيران اكثر من ١٠ ساعات ثم تنفيذ يوميه كامله ، حاول يكون الشوبينج فى اليوم
قبل الأخير أو حتى الأخير ، وبقدر أمكانك أربط المنتج بالمزارات السياحيه وخصوصا المتحف
والمعابد بمعنى أربط المنتج بالتاريخ لأثبات التفرد والقدم ، أختيار وقت الشوبينج أهم
عنصر فى نجاحه يفضّل صباحا أو بعد المزار الاول على أقصى تقدير وبعد ما يكون حصل نوع
من الصداقه والألفة بينك وبين الجيست . المهم تعمل اللى عليك وتاخذ بالأسباب والنتيجة
على الله ، مره اخرى أحذر تغير من مستوى شغلك لو كانت النتيجه غير مرضيه .
10-فى البدايات حاول متغيرش فى البرنامج . لكن يفضّل
بعد كده أنك تنظم البرنامج حسب التوزيع الجغرافي للمزارات يعنى يوميه (البلد) متحف
ومصر القديمه وخان الخليلي مع بعض فى يوم ، ويوميه الهرم معاها منفيس وسقاره فى يوم تانى .
11-علاقتك
بشركه السياحه اللى هتتعامل معاها لازم تكون فى أطار ( التكامل) وليس ( التبعيه) .
أنتوا الاتنين هتكملوا بعض هوه بيتعب فى أنه يجيب الجيست لحد عندك وأنت بتتعب فى إنجاح
المجموعه وتحقيق التارجيت المادى المطلوب منك واللى هتكسبوا منه أنتم الأتنين ، العلاقه
دى لو طغى فيها طرف على الأخر فسدت . وأحذر من الخطأ والمال الحرام ، ما الفايل ألا
عباره عن أمانه سلمتها لك الشركه لازم تكون أمين عليها ، طالب بحقك المادى والمعنوي
فى النور وعلنا بكل قوه وتبجح أن شئت ، ولكن ما اتفقتم على نظام معين فليس من حقك الأخلال
به ، وتأكد أن سمعتك أهم من أى شئ فلا تلوثها بدخل أسود مرفوض دينيا وملوث لسمعتك
. علاقتك بأى شركه هتتعامل معاها علاقه مصلحه مشتركه بحته قايمه على تبادل المصالح
لذلك أحرص أنك تبقى مرشد قوى عشان تكون مطلوب لتنفيذ أى نوع من المجموعات . الشركه
اللى هتقدرك ماديا ومعنويا أستمر معاها والعكس صحيح . وحذار أن تكون كالظل يتبع الناس
فى الظلام ويتركهم ليلا ، بمعنى من قدرك فى الصيف والشغل قليل حذار أن تلوى ذراعه فى
الشتاء عندما يحتاجك بشده . وحاول بقدر الأمكان تجنب الشركات سيئه السمعه فى تعاملها
مع المرشدين لأن النوع ده من الشركات هياخد من مجهودك وسمعتك أكتر ما هتاخد منه . حاول تتعامل مع الشركات الكبيره والقديمة ذات السمعه
الجيده اللى بتحترم المرشد وعندها استمراريه مش مجرد فرقعه شغل لفتره معينه وتنتهى.
12-السائق من أهم عناصر نجاح الفايل . لازم العلاقه
بينكم تكون قائمه على الاحترام المتبادل . لا تتكبر عليه ولا تكلمه بلهجه الأمر . عامله
كزميل عمل طالما إلتزم بعمله ولم يتجاوز حدود عمله أو تعامله معك . الفايل محتاج تعامل
جيد بين المنفذين حتى ينجح.
مع خالص التمنيات بالتوفيق والنجاح
فأما التوفيق فمن الله وإما السهو والخطأ والنسيان
فمن نفسى.
خالد شريف
مع تحيات مدونة
بتكلم صينى
0 التعليقات